كائن ما ...

[يحيى زكريا]

لساك مَاشى ...

جوه الدرب الواصل دايما للأوهام..

للمجهول..

لساك بتقول..

إن امبارح بكره حيرجع..

إن الفجر لابد حيطلع..

لساك بتعيد ..

نفس القول ..

لساك مصلوب..

فوق صلبان الوهم الخادع..

لساك بتراجع ..

كل فصول الحلم الماضى ..

مانتش راضى ..

تصحى وتنظر فى الاحوال..

ساجن عقلك ..

جوه حيطان الحلم الراقد ..

والمستسلم ..

حتى الحلم كمان اتكركب..

لما اتسرسب من جواك ..

إزاى تصنع حلم جديد ..

إزاى تبقى النبض الرافض للتكرار ..

لما اتسرسب من جواك ..

إزاى ترفض ..

إنك تركع للتمثال ..

والاقوال ..

فضلت زى ما هى كلام ..

والافعال ..

راحت جوه حصون الصمت ..

ماتت تحت حصون الكبت ..

وانت ما زلت ..

سايب نفسك ..

للى حييجى ..

واللى حيصبح ..

واللى حيبقى ..

رافض حتى حقيقة إنك..

ممكن تبقى ..

إنت الأقوى ..

م اللى راميك فى دروب التيه ..

واللى جعلته لسان وبيان ..

رافض تنظر بالتبيان ..

والالوان ..

صارت عندك كله رمادى ..

حتى القاضى ..

اللى كمان أصبح..

مش قاضى..

شافك نايم ..

قال لك نام ..

والاحكام اهى زى ماهيه ..

والحكام أهى باقيه اهيه ..

يرحل واحد ..

يفضل مِيَّه ..

واللى بيعلا..

واللى يعَلِّى ..

وانت وبس مطاطى تملِّى ..

خايف ترفض أى كلام..

خايف تسمع مره ضميرك ..

رامى حمولك ..

فوق راس غيرك ..

ليه بتلوم ..

وانت ملوم ..

إمتى حتصحى ..

إمتى تقوم ..

ليه بتعيب ع الدهر وإنت ..

نايم دهر..

ضهرك يابس ..

مش مفرود ..

عودك محنى ..

مش ممدود ..

حابس نفسك ..

جوه الطوق ..

حتى بيانك ..

مش منطوق ..

كل حروفك باتت ساكته ..

حتى هويتك ..

صارت باهته ..

والأوصاف ..

كائن ما..

ساكن كل حروف الخوف ..

فاقد دايما للإدراك..

فاقد حاسة سمع وشوف ..

حافظ صم شعار الثوره ..

ويا كمان حَبِّة تخاريف ..

للحريه ..

والقوميه ..

والعربيه ..

اللى راكبها عضو المجلس ..

لما تفوت ..

واما تعفر دقن جنابه ..

كان الاول..

يعشق ثومه..

وماتش الكوره..

اما الان ..

بَطَّل يعشق..

لساك ماشى ..

جوه قطيع الغنم الماشى ..

من غير صوت ..

خايف دايما..

م النبوت ..

حتى الراعى ..

ليك مش راعى ..

والعنوان ..

مش موجود فى الخانه الثابته للإنسان ..

سِنَّك ..

قالوا كام الف خريف..

حتى تاريخك..

دايما قابل للتحريف..

والتزييف..

وانت موافق..

مش بتعارض ..

مهما تلاقى..

بتقول ماشى ..

وانت الماشى ..

تفضل ماشى ..

جوه الدرب الواصل دايما للاوهام..

[ناديه حسين]

الله الله الله

لمست الجرح ياستاذ يحى

مكانك سر

هذي مشكلتنا .. ولو كل واحد حاول ينجز ..ويتقدم .كان ماكنش كائن ما

اللي قاهرني اني كذلك
كائن ما في الكون الهالك


لاعدمناك ايها الشاعر المتميز جدا

ودمت بخير

[ناديه حسين]

اللي قاهرني اني كذلك
كائن ما واقف متهالك

[عبدالوهاب موسى]

أدعو لنفسى ولكل من شارك فى هذه القصيدةولمن لم يشارك
فى هذه الأيام المباركة ألا يحرمنا من زيارة بيته الشريف قبل الممات.
وللمؤتمـِرين بالنجاح السياسى.
آمين آمين آمين يارب العالمين.
وكل عام والحميع بألف خير.
===============
وتحيتى للأخ الشاعر الرائع يحيى زكريا على رائعته
ولك ودى
ولى عودة.

[د. نجلاء طمان]

خطير أنت في الشعر العامي!

تصل الكلمة لي دوماً والهدف بسهولة وسلاسة

هذه السيمفونية المؤلمة

تذكرني بقصيدة قرأتها من قبل للعزيز الأخ: فوزي أبو دنيا

اسمها هز الهلال يا سيد

كنت أعد لها دراسة نقدية, لم تكتمل

ربما أفكر فعلاً وبجدية

في قراءة الكثير من القصائد العامية

دمت معبراً بعيداً عن عبودية السلبية التي نفرت منها في قصيدتك الرائعة


د. نجلاء طمان
الوردة السوداء

[يحيى زكريا]

الله الله الله

لمست الجرح ياستاذ يحى

مكانك سر

هذي مشكلتنا .. ولو كل واحد حاول ينجز ..ويتقدم .كان ماكنش كائن ما

اللي قاهرني اني كذلك
كائن ما في الكون الهالك


لاعدمناك ايها الشاعر المتميز جدا

ودمت بخير


أستاذتى ناديه

هى مشكلة المشاكل لولاها لكنا فى عداد المتقمين

السلبيه والرضوخ والرضى بالحال القائم دونما تغيير

ومع ذلك نتبرم ونضيق وفى النهايه نصمت

نسينا أن الله لا يغير ما بقوم حتى يغيروا ما بأنفسهم

أشكرك أستاذتى ناديه وأشكر تواجدك الرائع

[يحيى زكريا]

أدعو لنفسى ولكل من شارك فى هذه القصيدةولمن لم يشارك
فى هذه الأيام المباركة ألا يحرمنا من زيارة بيته الشريف قبل الممات.
وللمؤتمـِرين بالنجاح السياسى.
آمين آمين آمين يارب العالمين.
وكل عام والحميع بألف خير.
===============
وتحيتى للأخ الشاعر الرائع يحيى زكريا على رائعته
ولك ودى
ولى عودة.

تقبل الله دعواتك ودعواتنا جميعا أستاذى عبدالوهاب

وألاَّ يحرمنا الطواف حول بيته الكريم اللهم آمين

أشكرك أستاذى وأشكر دعواتك الجميله وتواجدك الرائع

[يحيى زكريا]

خطير أنت في الشعر العامي!

تصل الكلمة لي دوماً والهدف بسهولة وسلاسة

هذه السيمفونية المؤلمة

تذكرني بقصيدة قرأتها من قبل للعزيز الأخ: فوزي أبو دنيا

اسمها هز الهلال يا سيد

كنت أعد لها دراسة نقدية, لم تكتمل

ربما أفكر فعلاً وبجدية

في قراءة الكثير من القصائد العامية

دمت معبراً بعيداً عن عبودية السلبية التي نفرت منها في قصيدتك الرائعة


د. نجلاء طمان
الوردة السوداء

وخطيرة أنتِ عندما تمنحينى هذه الخطوره فى الكتابه أستاذتى د/ نجلاء

هذه السيمفونيه المؤلمة نتاج عزف طويل الأمد على أوتار السلبيه والرضوخ

فلتقرئى كثيرا فى العامية د/ نجلاء فان فيها الكثير والكثير من أنَّات الشعوب

أشكرك د/ نجلاء وأشكر تواجدك الرائع